dimanche 25 mars 2012

حلمك كابوس يا تونس

من الاكيد جدا انو التوانسة الكل عاشوا منامة جميلة و حلموا بتونس اخري حلموا بتوانسة متسامحين و توانسة قابلين بعضهم من الاكيد انو التونسي اللي خرج يصيح و يعيط و شبع مالغاز و العصا عمرو ما فكر لحضة في ما بعد خروج الزين و لكن كن الاكيد انو كان يتامل في تونس ازين بلا "الزين" و خرجوه و الا هرب هذا ماهوش موضوعنا و انما موضوعنا المنامة التونسية. منامة الشباب اللي قرا و قعد تخت الحيط منامة بو صغايرات يعدي نهارو يجري عالخبزة و ماعاش خالط منامة والدين يستناو بس يفرحوا بولاد ولادهم منامة شباب عندو طاقات كبيرة دمروهالهم منامة و حلم خلات التوانسة تخرج و تقول الكلمة الشهيرة "ديقاج" الحاصل المنامة طلعت كابوس و اللي لادت المنامة كابوس للاسف هوما سياسينا التوانسة " اغبي سياسي هذا العام" كيما اللي في الحكم كيما اللي في المعارضة و اهوكا في الهم عندك ما تختار. المفيد الحلم التونسي -متاعي عل الاقل- نشوف فيه وحدة وحدة و هو يتدمر من غباء سياسينا و بلادة ذهنهم و كان فما جملة تقالت من عضو في التاسيسي و تستحق اني نشكرو عليها هي كلمة القصاص اللي اقترح انو كل راس شهر الشعب يعطيهم طريحة. تقريبا مليون بطال و الحكومة عقيمة و المعارضة مازالت تلم في روخها و يحبلها ل2200 بش يتلموا و في الاخير التونسي لازمو يحلم بتونس تحت قيادة اهل ثقة و ذات قدرة علي تحقيق حلمهم.

Aucun commentaire:

Enregistrer un commentaire